Inskrywings het geopen vir die 2026 Suid-Afrikaanse Suiwelkampioenskappe, met Agri-Expo wat suiwelvervaardigers regoor die land nooi om in te skryf vir die 193ste aanbieding van Afrika se oudste en grootste suiwelkompetisie.
Die kampioenskappe lok jaarliks sowat 1 000 inskrywings van groot, medium en klein vervaardigers oor meer as 100 klasse. Produkte word beoordeel deur ’n onafhanklike paneel kundiges, met elke klaswenner wat as SA Kampioen bekroon word. Slegs produkte van uitsonderlike gehalte kwalifiseer vir die gesogte Qualité-merk van Uitnemendheid, terwyl die produk met die hoogste algehele punt as Produk van die Jaar aangewys word.
Die omvang en aansien van die kompetisie is verlede jaar onderstreep toe ’n rekordgetal 1 110 suiwelprodukte van 77 vervaardigers beoordeel is. ’n Paneel van 103 beoordelaars van 47 maatskappye het die inskrywings oor drie dae geëvalueer, met 114 SA Kampioene en 30 Qualité-bekroonde produkte wat uiteindelik aangewys is.
Volgens Breyton Milford, hoofbestuurder van Agri-Expo, bly die kampioenskappe ’n belangrike maatstaf vir uitnemendheid in die Suid-Afrikaanse suiwelbedryf. “Die volgehoue groei in inskrywings bevestig die waarde wat vervaardigers heg aan onafhanklike en geloofwaardige beoordeling,” sê Milford. “Kwaliteitsuiwelprodukte verdien erkenning en sigbaarheid by verbruikers – en dit is presies die rol wat hierdie kompetisie vervul.”
BELANGRIKE DATUMS
- Inskrywings open: Woensdag 28 Januarie 2026
- Inskrywings sluit: Maandag 23 Februarie 2026
- Aflewering van produkte: 23–24 Maart 2026 (Eensgezind, Durbanville)
- Beoordeling: 25–27 Maart 2026 (Eensgezind, Durbanville)
- SA Suiweltoekennings-seremonie: Donderdag 23 April 2026 (Nederburg, Paarl)
Vervaardigers kan aanlyn inskryf by www.sadairychamps.co.za. Die 2026 Suid-Afrikaanse Suiwelkampioenskappe word moontlik gemaak met die ondersteuning van platinumvennote IMCD en dsm-firmenich, asook ander borge. Vir meer inligting, skakel 021 863 1599 of 083 440 1628, of stuur ’n e-pos aan [email protected].