In die stryd teen bek-en-klouseer (BKS) in Suid-Afrika bly streng biosekuriteit en hegte samewerking die belangrikste wapens. Dit was die boodskap tydens ’n besoek deur dr. Ivan Meyer, Wes-Kaapse Minister van Landbou, Ekonomiese Ontwikkeling en Toerisme, aan Braams Voerkraal buite Durbanville.
Braams Voerkraal is die oudste voerkraal in die land en word sedert 1999 suksesvol deur die eienaar, Pieter Eksteen, bedryf. Die besoek het gewys hoe hierdie onderneming saam met die owerhede en die privaatsektor die bio-risiko’s van BKS doeltreffend bestuur.
Effektiewe bestuur deur noue samewerking
“Hier in die Wes-Kaap glo ons in effektiewe ekonomiese ontwikkeling en BKS-bestuur,” sê Minister Meyer. Hy benadruk dat sukses slegs moontlik is deur spanwerk tussen boere, staatsveeartse, privaat veeartse en rolspelers soos die Rooivleisprodusente-organisasie (RPO) en Agri Wes-Kaap. “Ons het ’n funksionele departement van veeartsenykunde nodig om dit te laat werk en ons het dit in die Wes-Kaap.”
Streng protokol en laerisiko-aankope
Dr. Cilliers Louw, die privaat veearts wat toesig hou oor die biosekuriteit en naspeurbaarheid (traceability), verduidelik dat 100% van die voerkraal se beeste uit Namibië ingevoer word – ’n laerisikogebied waar BKS nie voorkom nie. Die kraal ontvang weekliks sowat 300 tot 400 beeste.
“Ek moet persoonlik teenwoordig wees om die vragte se seëls te inspekteer en te breek, en die nodige dokumentasie en permitte na te gaan,” sê dr. Louw. “Beeste word binne 48 uur na aankoms teen BKS ingeënt, en tans is 100% van die kraal beskerm.” Hy bedank die owerhede vir hul deurlopende ondersteuning.
Jong talent aan die stuur
Vir Leana Hurter, een van die bestuurders en die eienaar se dogter, lê die dryfkrag in haar passie vir die bedryf. Sy het veekunde aan die Universiteit Stellenbosch gestudeer en haar betrokkenheid spruit uit ’n diep liefde vir diere.
Ten spyte van die huidige siektebedreigings, verseker die deurlopende monitering deur hul privaat veearts en die provinsiale ondersteuning dat hulle floreer. “Dit is wonderlik om as ’n jongmens deel te wees van so ’n funksionele werksmag. Ons gaan baie suksesvol wees in die toekoms.”
Die Wes-Kaapse benadering tot BKS-bestuur
Minister Meyer het afgesluit deur die provinsiale strategie op te som:
Funksionele veeartsenykundige dienste: Professionele staats- en privaatveeartse gesteun deur ’n provinsiale laboratorium.
Doelgerigte en onmiddellike reaksiespanne: Vinnige optrede gerig deur gereelde JOC-vergaderings.
Risikogebaseerde inentingsprosesse: Doeltreffende beskerming waar die risiko die hoogste is.
Breë betrokkenheid van die bedryf: Noue skakeling met boere, RPO, MPO, voerkrale, abattoirs, munisipaliteite en wetstoepassing.
Privaatsektor-betrokkenheid: Aktiewe deelname deur privaat praktisyns.
Skakeling en deurlopende oorlegpleging: Gesamentlike beplanning (joint planning) wat boere se sienings respekteer.
BKS-beheerpunte en inspeksieposte: Streng regulering van dierebewegings en biosekuriteit op plaasvlak.
BKS-kontrole: Inligting en deursigtigheid beskikbaar op www.elsenburg.com.
“Hier by die voerkraal is daar ’n tasbare liefde vir die diere. Daardie ingesteldheid, tesame met die wedersydse ondersteuning tussen die openbare en privaatsektor, is kritiek,” het Meyer gesê. “Ons maak goeie vordering en ons sal bek-en-klouseer in hierdie provinsie oorwin. Signing off for the love of Agriculture!”